छत्रपती संभाजीनगर : बीड जिल्ह्यातील मस्साजोग गावाचे सरपंच संतोष देशमुख यांच्या निर्घृण हत्याकांडात वाल्मिक कराड हाच मुख्य सूत्रधार असल्याचा ठाम युक्तिवाद मुंबई उच्च न्यायालयाच्या औरंगाबाद खंडपीठात करण्यात आला. शुक्रवारी न्या. एस. एम. घोडेस्वार यांच्या खंडपीठासमोर झालेल्या सुनावणीदरम्यान मुख्य सरकारी वकील अमरजितसिंह गिरासे यांनी तपशीलवार घटनाक्रम मांडत कराडची भूमिका स्पष्ट केली.
या प्रकरणात कराडच्या वतीने जामीन अर्ज दाखल करण्यात आला असून, आपण या हत्याकांडाशी संबंधित नसल्याचा दावा बचाव पक्षाकडून करण्यात आला आहे. मात्र, सरकारी पक्षाने सादर केलेल्या पुराव्यांवरून कराड हाच या कटाचा सूत्रधार असल्याचे स्पष्ट होत असल्याचा युक्तिवाद करण्यात आला.
बचाव पक्षाचा युक्तिवाद
कराडच्या वतीने सादर करण्यात आलेल्या जामीन अर्जात, सर्वोच्च न्यायालयाच्या ‘मिहीर शहा’ निर्णयाचा दाखला देत आरोपीला अटकेची कारणे लेखी स्वरूपात देणे बंधनकारक असताना ती देण्यात आलेली नाहीत, असा दावा करण्यात आला. तसेच या प्रकरणात मकोका कायदा चुकीच्या पद्धतीने लावण्यात आला आहे, आणि हत्येच्या दिवशी कराड घटनास्थळापासून शेकडो किलोमीटर दूर होता, त्यामुळे त्याचा गुन्ह्याशी काहीही संबंध नसल्याचा युक्तिवाद बचाव पक्षाने केला.
सरकारी पक्षाचा सविस्तर घटनाक्रम
या सर्व आरोपांना प्रत्युत्तर देताना मुख्य सरकारी वकील अमरजितसिंह गिरासे यांनी प्रत्येक तारखेप्रमाणे संपूर्ण घटनाक्रम न्यायालयासमोर उलगडून दाखवला. या हत्याकांडात केवळ प्रत्यक्ष हल्लेखोरच नव्हे, तर त्यामागील कट, आर्थिक व्यवहार आणि धमक्यांची साखळीही महत्त्वाची असल्याचे त्यांनी नमूद केले.
गिरासे यांनी सांगितले की, वाल्मिक कराड याने अवादा कंपनीकडून दोन कोटी रुपयांची खंडणी मागितली होती. या मागणीला संतोष देशमुख यांनी विरोध केला होता. यामुळे कराडच्या योजनांमध्ये देशमुख अडथळा ठरत होते.
धमक्या, मारहाण आणि कट
या प्रकरणात सहआरोपी सुदर्शन घुले याने अवादा कंपनीच्या कर्मचाऱ्याला मारहाण केल्याचा तसेच संतोष देशमुख यांना जीवे मारण्याची धमकी दिल्याचा घटनाक्रम सरकारी पक्षाने मांडला. या घटनेनंतर कराड याने आपल्या मागणीच्या आड येणाऱ्या देशमुखला “आडवा करा” असा आदेश दिल्याचा दावा करण्यात आला.
या आदेशानंतर सुदर्शन घुले आणि त्याच्या सहकाऱ्यांनी उमरी टोलनाक्यावरून संतोष देशमुख यांचे अपहरण केले. त्यानंतर त्यांना निर्जन ठिकाणी नेऊन अमानुष मारहाण करण्यात आली.
फोन कॉल्स, सीसीटीव्ही आणि फॉरेन्सिक पुरावे
सरकारी पक्षाने या प्रकरणात
प्रत्यक्षदर्शी साक्षीदार
मोबाईल कॉल डिटेल्स रेकॉर्ड (CDR)
सीसीटीव्ही फुटेज
ध्वनिफित मुद्रण
न्यायवैद्यक प्रयोगशाळेचा अहवाल
असे ठोस पुरावे न्यायालयासमोर सादर केले.
या मारहाणीच्या वेळी वाल्मिक कराड, विष्णू चाटे आणि सुदर्शन घुले यांच्यात सातत्याने फोनवर संभाषण सुरू होते, आणि कराडच मारेकऱ्यांना निर्देश देत होता, असा दावा गिरासे यांनी केला.
“मुख्य सूत्रधार कराडच”
या सर्व पुराव्यांच्या आधारे वाल्मिक कराड हा केवळ सहभागी नसून संपूर्ण हत्याकांडाचा मुख्य सूत्रधार आहे, असा ठाम युक्तिवाद सरकारी पक्षाने केला. त्यामुळे कराडला जामीन देऊ नये, अशी मागणीही न्यायालयाकडे करण्यात आली.
पुढील सुनावणी १६ डिसेंबरला
या प्रकरणावरील पुढील सुनावणी १६ डिसेंबर रोजी होणार असून, त्यावेळी जामीन अर्जावर अंतिम निर्णय अपेक्षित आहे. या हत्याकांडामुळे बीड जिल्ह्यासह संपूर्ण मराठवाड्यात खळबळ उडाली असून, न्यायालयीन निर्णयाकडे सर्वांचे लक्ष लागले आहे.
